Seks që në vitin e parë të gjimnazit, drogë në ambientet e shkollës, madje edhe shtatzëni të padëshiruara. Asgjë nuk përbën tabu për të rinjtë shqiptarë. E ndërsa ambientet e shkollës duhet të jenë vendet e edukimit të tyre, ato janë kthyer pikërisht në vatrat e këtyre fenomeneve.

Më alarmante situata është në gjimnazet e kryeqytetit, ku duket se “civilizimi” ka arritur kulmin. Ndërsa prindërit janë të fundit, që marrin vesh për atë që bëjnë këta të rinj. Ata të sigurt i nisin fëmijët në shkollë, por duket se për këtë të fundit gjimnazistët shqiptarë nuk mendojnë shumë. Sipas studimit më të fundit të Institutit të Shëndetit Publik, lidhur me sjelljet e rrezikshme tek adoleshentët ka rezultuar se 1 në 8 gjimnazistë ka një jetë aktive seksuale. Madje 10% e tyre pas anketimit kanë pranuar se gjatë shkollës së mesme kanë pasur më shumë se dy të dashur. Rreth 15% e tyre pranojnë se kanë kryer marrëdhënie seksuale për herë të parë në vitin e parë të shkollës së mesme, ndërsa rreth 30% e kanë pranuar se kjo gjë ka ndodhur në vitin e katërt të gjimnazit. Gjatë këtij studimi, pyetjes nëse kanë kryer marrëdhënie në tre muajt e fundit i janë përgjigjur me po 22% e djemve dhe 16% e vajzave gjimnaziste dhe, sipas specialistëve të ISHP-së, ka rezultuar se për këta të rinj nuk përbën problem ndërrimi i partnerëve. Shtatzënitë e padëshiruara janë provuar nga rreth 3.5% e gjimnazisteve. Kjo shifër është një tregues i qartë që nuk janë të pakta rastet kur vajzat abortojnë në moshë të vogël, veprim ky që mund të lërë pasoja për shëndetin e tyre. Për sa i përket ndarjes, femra-meshkuj janë katër herë më të shumtë në numër meshkujt që pranojnë se kanë kryer marrëdhënie seksuale në gjimnaz krahasuar me femrat. Këto të fundit, sipas specialistëve të ISHP-së ngurojnë ta pranojnë hapur një gjë të tillë.