Nejrin Salim: Në vitin 1998 e bëra haxhin, mirëpo nuk isha e mbuluar dhe as nuk isha e rregullt në namaz, e ndjeja se jam e shkujdesur në adhurimin tim ndaj Zotit, por asnjëherë nuk e paramendoja se do të mbulohem, ose thënë më mirë po turpërohem, ngase tërë ajo që bëra ishte se e vendosa shaminë, e cila m’i mbulonte vetëm flokët dhe qafën, ndërsa rrobat tjera ishin të zakonshme, i vishja pantallonat e gjera, dhe e bëja jetën time normale. Vendimi për t’i mbuluar flokët e mia më erdhi në ramazanin e kaluar gjatë përcjelljes së një ligjërate fetare të shejhut Muhammed Gazali, Allahu e mëshiroftë, në televizionin egjiptian, ku fliste për vdekjen, dhe se besimtari i vërtetë, i cili e pason Zotin e tij, e i zbaton urdhërat e tij, do ta gëzojë qetësinë shpirtërore në dunja e do të shpërblehet me xhenet në ahiret. Në atë moment i thashë burrit tim, Dr.Ali Sa’d Zaglul, i cili ishte duke e përcjellur programin së bashku me mua: A ke gjë kundër nëse unë mbulohem? Ai tha: Nga unë nuk ke kurrfarë pengese, por të këshilloj që të mos ngutesh e të mendohesh mirë, ngase ky është një vendim i rëndë dhe se do të përballesh me probleme në punën tënde. Unë i thashë atij: Bekimi i Allahut qoftë me ne! Kjo ndodhi afërsisht dhjetë ditë pas fillimit të ramazanit, shkova në punë me datën 28 nëntor dhe kolegët e mi mendonin se do ta bart hixhabin vetëm gjatë muajit ramazan, por ata u befasuan kur u thashë se do ta vesh përherë dhe ata u çuditën, megjithatë shumica e kolegëve ma uruan dhe ma tërhoqën vërejtjen për problemet, të cilat mund t’i kem prej përgjegjësve të kompanisë, unë iu thashë: Allahu është Ai, prej të Cilit kërkohet ndihmë, unë nuk po bëj ndonjë gabim e sa i përket uniformës nuk po i shkeli ligjet e kompanisë, shamia është me ngjyrën e uniformës dhe jam e gatshme ta vendosi simbolin e kompanisë në të, ngase unë e kuptoj plotësisht natyrën e punës sime dhe jam e gatshme të gjejmë një zgjidhje mesatare.
Në fakt shkova në punë tre ditë me hixhab, u vendos emri im në listën e fluturimeve në relacionin Kairo-Aksar-Paris, vajtje e ardhje. Problemi nuk shpërtheu derisa dola në tokën e aeroportit për fillimin e fluturimit, udhëheqësi i fluturimit kapiten piloti Tarik Anan më tha: Kjo veshja jote ngërthen probleme me përgjegjësit e kompanisë, ndaj patjetër duhet ta marrësh pëlqimin e tyre. I thashë: Unë nuk jam duke i shkelur rregullat e uniformës. I bëri telefonatë kapitenit Zahir Zekij drejtor i veprimeve, i cili tha: Heqja e hixhabit është kusht për pjesëmarrje në fluturim. Ose përndryshe do të shlyhet emri im nga lista menjëherë. Unë ngula këmbë në mendimin tim, e ata këmbëngulën në kërkesën e tyre, kështu që u caktua dikush tjetër për këtë udhëtim dhe u kërkua nga unë zgjedhja e problemit me admiralin Hilmi Seruri, drejtor ekzekutiv në kompani. Shkova tek ai, dhe u befasova kur ai ma ofroi njëren prej dy zgjedhjeve: Ose veshjen e hixhabit, ose vazhdimin në punë, e asesi nuk ka mundësi të bashkohen që të dyja në të njëjtën kohë! I thashë: Rregullat e kompanisë dhe kontrata e saj nuk e cekin një gjë të tillë, këto janë specifikat e uniformës dhe hixhabi nuk është në kundërshtim me këto udhëzime. Ai më tha: Këto janë rregulla gojore, e ato të shkruarat nuk kanë vlerë në këtë rast. I bëri telefon drejtorit të veprimeve e i tha: Nëse nuk e heq hixhabin, i shlyhet emri nga lista e punës dhe i ndalet mëditja! Me të vërtetë më përjashtuan nga puna më 31 dhjetor 2001, e as që ma dhanë mëditjen e dhjetorit, madje refuzuan të ma japin edhe vendimin zyrtar me shkrim të përjashtimit tim nga puna, por më thanë se do të ta dërgojmë me postë. Akoma deri më tani, pas tre muaj të përjashtimit tim nga puna, nuk më ka arritur ky vendim me shkrim.
Çështja nuk u ndal këtu, por shkoi edhe më larg, drejtori ekzekutiv më tha: Ti nuk do të punosh te ne përderisa ta heqësh hixhabin, madje edhe atë në zyrën time, e nëse na pëlqen forma jote, atëherë vendosim se a do ta vazhdosh punën tënde me ne. Ai poashtu më informoi se ata do ta ngrisin akuzën kundër  meje dhe do të kërkojnë kompenzim në vlerë të katërdhjetë e pesë mijë dollarëve, ky është dënimi për atë që jep dorëheqje apo për atë që dëshmohet moskualifikimi adekuat i tij. Pra, zgjedhja e vetme është heqja e hixhabit!